Search

သိမှု အပြုအမူဆိုင်ရာ ကုထုံး Cognitive Behavioral Therapy (CBT) အကြောင်း

Project Coordinator
Mar 19
2 min read

လူတွေရဲ့ အတွေးတွေ၊ ခံစားချက်တွေနဲ့ လုပ်ဆောင်ချက် အပြုအမူတွေဟာ တခုနဲ့ တခု ဆက်စပ်နေတယ် ၊ ဒါ့ကြောင့် အတွေးတွေကို ပြောင်းလဲရင် ခံစားချက်တွေ ပြောင်းလဲလာပြီး အပြုအမူတွေ မှာ သက်ရောက်မှု ရှိတယ်။ ဒီလိုမျိုး အယူအဆအားဖြင့် စိတ်ရောဂါကို ကုသတဲ့ နည်းလမ်းတခုကတော့ သိမှု အပြုအမူဆိုင်ရာ ကုထုံး (Cognitive Behavioral Therapy - CBT) ဖြစ်ပါတယ်။ CBT ဟာ စကားပြောခြင်းအားဖြင့် ကုသတဲ့ ကုထုံးတမျိုးဖြစ်သလို စိတ်ကုထုံးတွေထဲမှာ အသုံးများပြီး ထိရောက်မှု ရှိတဲ့ ကုထုံးတမျိုး ဖြစ်ပါတယ်။

သိမှု အပြုအမူဆိုင်ရာ ကုထုံးကို အသုံးပြုနိုင်သည့် စိတ်ရောဂါ အခြေအနေများ

CBT ကို စိတ်ရောဂါ အခြေအနေ အများစုနဲ့ စိတ်ပိုင်းဆိုင်ရာ ပြဿနာတွေမှာ အသုံးပြုကြပါတယ်။ အထူးသဖြင့် စိတ်ကျရောဂါ၊ စိတ်ပူပန်ခြင်း၊ အရက်နဲ့ ဆေးကြောင့် စိတ်ပိုင်းဆိုင်ရာ ပြဿနာ ခံစားရခြင်း၊ အစားအသောက်ဆိုင်ရာ စိတ်ပြဿနာ၊ စိတ်အတက်အကျ ရောဂါ၊ တခုခုကို စွဲလမ်းစိတ်ကြောင့်ရတဲ့ စိတ်ရောဂါ၊ ကြောက်ရွံ့ခြင်း၊ စိတ်ကစဥ့်ကလျား ဖြစ်ခြင်း၊ စိတ်ဒဏ်ရာ တခုခုကြောင့် စိတ်ရောဂါ ခံစားရခြင်း နဲ့ အိပ်မပျော်ခြင်း စတဲ့ အခြေအနေတွေမှာ အသုံးပြုနိုင်သလို ရလဒ်ကောင်းတွေ ရတာကို လေ့လာမှုတွေအရ တွေ့နိုင်ပါတယ်။

သိမှု အပြုအမူဆိုင်ရာ ကုထုံးနဲ့ ကုသနေစဥ် အတွင်း မျှော်လင့်ထားသင့်သည့် အချက်များ

မေးခွန်းတွေ မေးမယ်
ပြဿနာတွေကို ခွဲခြမ်းစိတ်ဖြာပြီး အဖြေရှာမယ်
မလိုအပ်တဲ့ အတွေးတွေနဲ့ အပြုအမူတွေကို ဖယ်ရှားနိုင်ဖို့ ကူညီမယ်
လေ့ကျင့်ခန်းတွေ လုပ်ရမယ်
ဒီကုထုံးကနေ သင့်ဘဝအတွက် အသုံးဝင်မယ့် စွမ်းရည်တွေကို သင်ကြားပေးနိုင်မယ်
ကုထုံးအောင်မြင်သွားတဲ့အခါမှာ ဘဝအတွက် သက်ရောက်နေတဲ့ အဆိုးတွေကို ရပ်တန့်နိုင်အောင် ကူညီနိုင်မယ်

သိိမှု အပြုအမူဆိုင်ရာ ကုထုံးရဲ့ ကောင်းကျိုးများ

CBT ကုထုံးဟာ တခြား ကုထုံးတချို့နဲ့ ယှဥ်ရင် အချိန်တိုအတွင်းမှာ သိသာတဲ့ ရလဒ်တွေကို ရနိုင်သလို အတွေးတွေကို ပြောင်းလဲပေးခြင်းဖြစ်လို့ ကုသပြီးနောက်မှာလည်း ထူးခြားတဲ့ ကောင်းကျိုးတွေကို ရစေနိုင်ပါတယ်။ CBT နဲ့ ကုသတဲ့အခါမှာ ဘေးထွက်ဆိုးကျိုး အများအားဖြင့် မရှိသလောက် နည်းပါးသလို လူအများစုနဲ့ စိတ်ကျန်းမာရေး ပြဿနာ အများစုအတွက် အဆင်ပြေတဲ့ ကုထုံး တခုလို့လည်း ပြောနိုင်ပါတယ်။ ဒါပေမယ့် အရေးကြီးတာ တခုက သိိမှု အပြုအမူ ဆိုင်ရာ ကုထုံးကို အသုံးပြုတဲ့အခါမှာ ကာယကံရှင်အနေနဲ့ အစအဆုံး ကိုယ်တိုင် ပူးပေါင်း ပါဝင်ရမှာ ဖြစ်သလို လေ့ကျင့်ခန်းတွေနဲ့ အိမ်စာတွေကို လိုက်ပါ လုပ်ဆောင်ဖို့ လိုပါတယ်။

သိမှု အပြုအမူဆိုင်ရာ ကုထုံးရဲ့ ဆိုးကျိုးများ

စိတ်ပညာနဲ့ ပတ်သက်တဲ့ ကုထုံးတွေ အကုန်လုံးက အလုံးစုံ ပြီးပြည့်စုံတယ်လို့ တော့ မပြောနိုင်ပါဘူး။ တခါတရံမှာ ကုထုံးရွေးချယ်မှု မကိုက်ညီတာ၊ ကျွမ်းကျင်မှု နည်းပါးတဲ့ ပညာရှင်နဲ့ ကုသမိတာ စတဲ့အချိန်တွေမှာတော့ ရလဒ်တွေ မသိသာတာ၊ ဆိုးကျိုးများတာတွေ ရှိနိုင်ပါတယ်။ CBT ကို အသုံးပြုခြင်းက ဆိုးကျိုးနည်းပါးတယ်ဆိုပေမယ့် တခါတရံမှာ ကိုယ့်ရဲ့ ခံစားချက်ကို ဆိုးရွားစေတဲ့ အရာကို ထိပ်တိုက်ရင်ဆိုင်ရခြင်း ဥပမာ Exposure Therapy နဲ့ ကုသတဲ့အခါမှာ ကိုယ့်အတွက် ခက်ခဲတဲ့ စိန်ခေါ်မှုတွေ ဖြစ်နိုင်ပါတယ်။

သိမှု အပြုအမူဆိုင်ရာ ကုထုံးအတွင်း သင်မျှော်မှန်းထားရမည့် အရာများ

CBT ကုထုံးရဲ့ ပထမ တွေ့ဆုံမှုမှာ နှစ်သိမ့်ဆွေးနွေးသူအနေနဲ့ သင့်ကို မေးခွန်းတွေ မေးမြန်းမှာ ဖြစ်ပြီး အထူးသဖြင့် သင်ခံစားနေရတဲ့ ခံစားချက်တွေနဲ့ သင့်ရဲ့ လက်ရှိအခြေအနေကို သင်ကိုယ်တိုင် နားလည်နိုင်စေဖို့ လက်ရှိနဲ့ အတိတ်က အကြောင်းအရာတွေကို မေးမြန်းမှာ ဖြစ်ပါတယ်။ ထို့နောက် ဒီကုထုံးကနေ သင်မျှော်လင့်ထားတဲ့ ရည်မှန်းချက်တွေ၊ ကုထုံးရဲ့ ကြာချိန်နဲ့ တွေ့ဆုံမှု ဘယ်နှစ်ကြိမ်လောက် ဖြစ်နိုင်ချေ ရှိတယ် ဆိုတဲ့ အချက်တွေကို ဆွေးနွေးမှာ ဖြစ်ပါတယ်။ အဓိကအားဖြင့် သင်ရဲ့ အဆိုးဘက်ကို သွားနေတဲ့အတွေးတွေ၊ သင့်ရဲ့ ခံစားချက်ကို ထိခိုက် စေတဲ့ အတွေးတွေကို ပြုပြင်ပြောင်းလဲဖို့အတွက် ကူညီပေးမှာ ဖြစ်ပါတယ်။ နောက်ပိုင်းတွေ့ဆုံမှုတွေမှာ လိုအပ်တဲ့ လေ့ကျင့်ခန်းတွေကို သင့်အတွက် စီစဥ်အကြံပေးမှာ ဖြစ်ပါတယ်။

CBT နည်းလမ်းဟာ ရလဒ်တွေ ကောင်းမွန်တဲ့ သာဓက တွေ ရှိသလို အသုံးများတဲ့ ကုထုံးတခု ဖြစ်တယ်ဆိုပေမယ့် လူတိုင်းနဲ့ အဆင်ပြေတဲ့ ကုထုံးလို့တော့ တထစ်ချ ပြောလို့မရပါဘူး ။ အထူးသဖြင့် CBT နဲ့ ကုသဖို့အတွက် ရွေးချယ်တော့မယ်ဆိုရင် ကိုယ်နဲ့ အတူ ဆွေးနွေးကုသပေးမယ့် စိတ်ပညာရှင်ဟာ ကျွမ်းကျင်မှု ရှိဖို့လိုသလို ခံစားနေရတဲ့ အခြေအနေအရ ကုသပေးနိုင်သူ ဖြစ်ဖို့လိုပါတယ်။ Calll Me Today မှာ ဒီလိုမျိုး CBT ကုထုံးကို ကျွမ်းကျင်တဲ့ ပညာရှင်တွေ များစွာ ရှိသလို သင့်ရဲ့ စိတ်ကျန်းမာရေး ပြဿနာတွေကို ကူညီဖို့ အသင့်ရှိနေပါတယ်။

သင့်အနေနဲ့ CBT ကုထုံး အပါအဝင် တခြားသော ကုသမှုတွေနဲ့ စိတ်ပိုင်းဆိုင်ရာ ပြဿနာတွေကို ဖြေရှင်းလိုတယ်ဆိုရင် Call Me Today မှတဆင့် ကျွမ်းကျင် ပညာရှင်တွေနှင့် တွေ့ဆုံကာ အခုပဲ နှစ်သိမ့်ဆွေးနွေးနိုင်ပါပြီ။ Booking ပြုလုပ်ရန်အတွက် ဒီနေရာကို နှိပ်ပါ။

🌐 : https://app.callmetoday.org/book

☎️: 09-5131873