ပြင်းထန်တဲ့ ငလျင်ဘေးကို ကြုံတွေ့ရပြီးနောက် အထူးဂရုစိုက်ရမယ့် စိတ်ကျန်းမာရေး
- Project Coordinator
- 1 day ago
- 1 min read
Updated: 5 hours ago
သဘာဝဘေးအန္တရာယ်တွေဟာ ရှောင်လွှဲလို့မရသလို မမျှော်လင့်ထားတဲ့ အဖြစ်အပျက်တွေကို ဖြစ်စေနိုင်ပြီး နောက်ဆက်တွဲ အနေနဲ့ စိတ်ပိုင်းဆိုင်ရာ ရုပ်ပိုင်းဆိုင်ရာ ထိခိုက်နစ်နာမှုတွေ ကို ကြုံတွေ့ရနိုင်ပါတယ်။ အထူးသဖြင့် လက်တလော ပြင်းထန်တဲ့ ငလျင် ဘေးအန္တရာယ်ကြောင့် တုန်လှုပ်ခြောက်ခြားမှုတွေကို ကြုံတွေ့ခံစားရတဲ့အခါ စိတ်ပိုင်းဆိုင်ရာ ပြဿနာများစွာကို ဆိုးရွားစွာ ရင်ဆိုင်ရနိုင်ပါတယ်။ ဒီ စိတ်ပိုင်းဆိုင်ရာ အခြေအနေတွေ လျော့ပါးသက်သာပြီး စိတ်ကျန်းမာရေးကို ဂရုစိုက်နိုင်မယ့် နည်းလမ်းတွေကို မျှဝေပေးချင်ပါတယ်။
(၁) ကိုယ့်ရဲ့ ခံစားချက်တွေကို အသိအမှတ်ပြုပါ
လက်ရှိ အခြေအနေကြောင့် ကြေကွဲဝမ်းနည်းခြင်း၊ ပူဆွေးသောကရောက်ခြင်း၊ တုန်လှုပ်ကြောက်ရွံ့ခြင်း၊ စိတ်ဓါတ်ကျခြင်း စတဲ့ ခံစားချက်တွေကို ကြုံနေရတယ် ဆိုရင် ဒါဟာ သဘာဝ ဘေးအန္တရာယ်နဲ့ နောက်ဆက်တွဲ အဖြစ်အပျက်တွေကြောင့် ဖြစ်လာတဲ့ ခံစားချက်တွေ ဖြစ်ကြောင်း အသိအမှတ်ပြု လက်ခံဖို့ လိုပါတယ်။ အခြေအနေအရ ထိန်းချုပ်ရခက်တဲ့ ဒီခံစားချက်တွေကို ရှောင်တိမ်းဖို့ မကြိုးစားပဲ အသိအမှတ်ပြု လက်ခံပြီးနောက်မှာ ခံစားချက်တွေ လျော့ပါးသက်သာစေမယ့် နည်းလမ်းတွေကို သင့်တော်သလို ရှာဖွေရမှာ ဖြစ်ပါတယ်။
(၂) လုံခြုံမှုကို တည်ဆောက်ပါ
ငလျင်ဘေးကို ကြုံတွေ့ရသူအများစုဟာ ကြောက်ရွံ့ထိတ်လန့်မှုနဲ့ ဘေးအန္တရာယ် နောက်တစ်ကြိမ် ကြုံမှာကို တွေးပူတတ်ကြပါတယ်။ ဒီလို ပူပန်ကြောင့်ကြစိတ်တွေကြောင့်ပဲ ကိုယ့်ရဲ့ စိတ်ကျန်းမာရေးကလည်း ပိုမို ဆိုးရွားလာတတ်ပါတယ်။ ဒါ့ကြောင့် ရုပ်ပိုင်းဆိုင်ရာ လုံခြုံစိတ်ချရတဲ့ ပတ်ဝန်းကျင် တစ်ခု လိုအပ်သလို စိတ်ပိုင်းဆိုင်ရာအားဖြင့် လည်း လုံခြုံစိတ်ချမှုရှိအောင် တည်ဆောက်ဖို့ အရေးကြီးပါတယ်။ ဥပမာ ကိုယ့်ကို စိတ်ပိုင်းဆိုင်ရာ လုံခြုံမှု ပေးနိုင်တဲ့ အသိုင်းအဝန်း ဒါမှမဟုတ် ကွန်ယက် တစ်ခုကို ရှာဖွေ ဖို့ လိုပါတယ်။
(၃) တခြားသူများနဲ့ ဆက်သွယ်ပါ
ငလျင်ဒဏ်ကြောင့် စိတ်ပိုင်းဆိုင်ရာ မတည်ငြိမ် ဖြစ်နေချိန်မှာ တစ်ယောက်တည်း အချိန်ကုန်ဆုံးတာဟာ စိတ်ခြောက်ခြားမှုကို ပိုဆိုးစေပြီး အတွေးတွေကြောင့် မွန်းကြပ်စေပါတယ်။ ဒါ့ကြောင့် ကိုယ့်နဲ့ အဖြစ်အပျက်တူပြီး ရင်ဘက်ချင်းတူသူတွေ ဒါမှမဟုတ် ကိုယ့်ကိုနားလည်ပေးနိုင်မယ့်သူ လုံခြုံစိတ်ချမှုနဲ့ နှစ်သိမ့်ကူညီပေးနိုင်သူတွေကို ဆက်သွယ်ပြီး ခံစားချက်တွေကို ရင်ဖွင့်ဖို့ လိုပါတယ်။ ဒါကလည်း စိတ်ခံစားချက်တွေကို သက်သာအောင် ကူညီပေးနိုင်တဲ့ ထိရောက်တဲ့ နည်းလမ်း တစ်ခုဖြစ်ပါတယ်။
(၄) စိတ်တည်ငြိမ်အောင် လေ့ကျင့်ပါ
သဘာဝ ဘေးအန္တရာယ်ကြောင့် စိုးရိမ်ကြောင့်ကြမှုနဲ့ ပူပန်မှုတွေကို ခံစားရတဲ့အခါမှာ စိတ်ပိုင်းဆိုင်ရာအားဖြင့် တည်ငြိမ်အောင် လေ့ကျင့်ဖို့ လိုပါတယ်။ ဥပမာအားဖြင့် အသက်ရှု လေ့ကျင့်ခန်းလုပ်တာ၊ Mindfulness လေ့ကျင့်တာ စတာတွေကလည်း စိတ်ကိုတည်ငြိမ်အောင် ကူညီပေးနိုင်ပါတယ်။
(၅) စိတ်ပိုင်းဆိုင်ရာ အကူအညီ ရယူပါ
ငလျင်ရဲ့ ထိခိုက်မှုနဲ့ သက်ရောက်မှု အတိုင်းအတာဟာ လူတိုင်းအတွက် မတူညီနိုင်သလို နောက်ဆက်တွဲ ခံစားရတဲ့ စိတ်ပိုင်းဆိုင်ရာ ပြဿနာတွေရဲ့ အတိမ်အနက်ကလည်း ကွဲပြားနိုင်ပါတယ်။ ငလျင်ကြောင့် ကြီးမားတဲ့ စိတ်ပိုင်းဆိုင်ရာ ဆိုးကျိုးတွေကို ခံစားရပြီး တည်ငြိမ်တဲ့ အနေအထားရောက်ဖို့ ခက်ခဲတယ်၊ ဆိုးရွားတဲ့ စိတ်ကျန်းမာရေး အခြေအနေကို ရင်ဆိုင်ကြုံတွေ့နေရတယ် ဆိုရင်တော့ လိုအပ်တဲ့ စိတ်ကျန်းမာရေးအကူအညီကို ယူဖို့ အကြံပြုလိုပါတယ်။
ငလျင်ဒဏ်ဘေးသင့်ပြည်သူများအတွက် ပြန်လည်ထူထောင်ရေး တထောင့်တအား အဖြစ် Call Me Today မှ ပညာရှင်များမှ “အခမဲ့” တိုင်ပင်ဆွေးနွေးပေးမဲ့ အစီအစဉ်လေးကို 2025 ဧပြီလ တစ်လ လုံး ပြုလုပ်ပေးသွားမှာဖြစ်ကြောင်းလဲ အသိပေးလိုပါတယ်။ မိမိကိုယ်တိုင်ဖြစ်စေ၊ မိမိပတ်ဝန်းကျင်မှ မိတ်ဆွေများ ဖြစ်စေ ငလျင်ဘေးဒဏ်ကြောင့် စိတ်ပိုင်းဆိုင်ရာ ထိခိုက်မှု ခံစားနေရတယ်ဆိုရင် Call Me Today Facebook Page Messenger က တစ်ဆင့် Free Counseling Appointment ဆက်သွယ် ရယူပေးရန် မေတ္တာရပ်ခံလိုပါတယ်။
☎️: 09-5131873
